أزيكوا يا مدونين ياحلوين ياطعمين
يارب يارب تكونوا بخير
عاوزة أحكيلكوا حكاية صغيرة كدا
ها أحكيها بسرعه ومش ها أطول عليكوا
انا وهبة احلي فراشة في الدنيا طبعا
كنا بنتكلم عادي في مواضيع كتير
وبعدين الكلام جاب بعضه ولائيتها بتقولي
انها عاوزة تعمل بلوج تاني تتكلم فيه براحتها شويه عن المواقف اللي بتحصلها
وأزاي هي بتشوف الكون والعالم من حواليها
قومت انا قولتلها أيه دا بجد؟
وأنا كمان كنت عاوزة أعمل بلوج تاني أتكلم فيه براحتي
بس كسلت وأجلته
وبعدين قالتلي خلاص أيه رأيك نعمله سوا
قولتلها أيه رأيي؟!!
موافقة طبعااااااااا
أنتي بتهزري
وقد كان
تم العمل علي قدم وساق
حتي ظهر لكم هذا البلوج
اللي بنتوقعله نجاح كااااااااسح خلال الأيام القادمة
البلوج دا هانتكلم فيه أنا وهبه عن أي حاجة تيجي في بالنا
ممكن يكون في بوستات مالهاش معني ومايكونش ليها ملامح
بس دا عادي جدا جدا ولازم تعودوا نفسكوا علي كدا من دلوئتي
احنا في البلوج دا هاننطلق
وأنتوا معانا طبعا
يلا بئي علشان ما أطولش عليكوا وانتظروا أول أنطلاقة أقصد أول بوست قريب جداا
و هنا تدخلت الفراشة لتعكنن عليكم الدنيا :) و تقول لأ بأة هنطوّل عليكوا كمان شوية، بس مش كتير يعني
بس كان لي ملحوظتين... أولهم..... قلب ينبض الله زعلت من الملحوظة فمش هكتبها
:)
تانيهم... إن النجاح الكاسح دة توقع القلب الجميل اللي بينبض بأحلى كلمة في الوجود، لكن الفراشة كل اللي تقدر تقوله إن يارب البلوج يكون كويس إن شاء الله و يكون فيه أي إفادة و يارب يعجبكم
ملحوظة نونو كمان :))): انتظروا قلب ينبض الله في ثوبها الجديد.. أو ممكن نقول جانب من شخصيتها مش كتير يعرفوه
يللا سلااااااام
24 comments:
انا اول واحد هنااااااااا
نيااهاهاهاهاهاهاها
بلوج
فراشة
قلب ينبض
مع بعض
ف رمضان
احمدك يارب
انا مستنييييي بفارغ الصبر
يارب كل يوم بلوج جديد
واكيد هايعجبوني طبعا
بالتوفيق ومنتظرين حاجات متاكد انها هاتكسر الدنيا
هو انا اول واحد بجد ؟
مش مصدق نفسي
الاسعاف يا محسن !!!!!
طبعا محسن معروف هو مين
هو مين صحيح محسن ؟
اكيد مش محسن ممتاز بتاع رأفت الهجان
التاني كان اسمه محسن بيه
word verification ????
ليه؟
قشطططططططة
خبر جميل جدا وتحفة جدا
والف مبروك البلوج وفى انتظار احلى بوستات من اجمل مدونتين فيك يا بلوجر دوت كوووووم
تحياتى ليكم
وكل سنة وانتوا طبيبن ورمضان كريم
متتأخروش علينا
-------------
ملحوظة رقم مية وسبعتاشر
ممكن تشيلوا بس ال
Word Verification
عشان نفسيتى بتتعب منها لانها بتعاند معايا كتير على ما بتخليمى انشر التعليق
الى اللقاء
ملحوظة: قلب ينبض الله هتردعلى التعليقات بعدكدةإن شاء الله بس لسة فيه لخبطة عشان احنا الاتنين كتبنا المرة دي بس
مع تمنياتي للجميع بالتوفيق
ولـــو
إزاي كدة أصلا؟؟
:)
مبروك عليك أول تعليق في أول بوست في بلوج جديد :). يــارب فعلا ينال إعجابكم إن شاء الله
قلب ينبض الله هي اللي هتبدأ و انا نفسي مش عارفة هي هتكتب إيه :) بس متأكدة إنه كلام لذيذ إن شاء الله
لعلمك عربية الاسعاف مش عرفت تمشي من كتر الزحمة و محسن قرر يكلمنا يقولنا إنه هيقدم استقالته :).أتمنى عمرك ما تحتاج للإسعاف يا ولو
ملحوظتك هي نفسها بتاعة حدوتة.. علم و ينفذ إن شاء الله، هتخلص منها حالا
:)
ولــو..نورت البلوج الجديد بجد :)
يااااااه !!!! حدوتة؟؟
:)
إزييييك؟؟ يارب تكوني بخير و يكون رمضان سعيد عليكي
كـانت مفاجأة أوي إني ألاقي تعليقين النهاردة:) و منهم واحد من حدوتة شخصيا!! بس بجد مفاجأة جميلةأوي
إحنا مش قلنا حاجة عن البلوج وقررنا بس نحطه عادي و نسيب الناس تكتشف براحتها :) بس اكتشافك كان سريع ماشاء الله
ردا على ملحوظة رقم ميةخمسة وعشرين...عندك حق جدا :). حاضر أكيد
رسمتي ابتسامة على وشي بجد لما شفت اسمك في التعليقات. رمضان كريم يا توتة
ولو
هههههههههههههههههه
أيه النور دا كله؟
ولو أول واحد بيسيب كومنت في أول بوست في أول بلوج بيني وبين هبه
دا أنت بئيت من الأوائل
محسن مين بئي دا أنت واصل ولا محسن ولا شريف
يارب يارب يارب يارب البلوج يعجبكوا
ويارب يارب نفضل سوا أصحاب في الخير
وكل سنة وأنت طيب
حدوتة
أيه دا؟
أنتي عرفتي البلوج بتاعنا بالسرعة دي أزاي
أكيد ليكي واسطة :D
بجد مبسوطة جدا علشان أنتي عرفتي البلوج دا
بس لازم تتابعيه:)
يارب تنورينا كدا علي طول ياقمر
سلام
فراشه
ذات القلب النابض
أنا طبعا ببارك بس كمان عايز أقول أني أول واحد شاف البلوج بس مكومنتش وعشان أعوض أحب أعرفكم ان ده اول كومنت بالنسبلي من البيت
على الهامش
أنا عايز ردين زي ولو وحدوته أنا مليش دوه
إنسان مقيد
شكرا يا مقيد :)
و دة شرف أكيد لينا إنه يكون أول كومنت من بيتك و إنك تشوف البلوج أصلا
دة ردي و إن شاء الله قلب تبقى ترد لما تقدر
:)
شفت بأة الرد جه سريع إزاي؟ تعليقك فرق معانا بجد :). نورت
زائر كان معدى وجد احتفالا كبيرا بمولد بلوج مشترك زى كوريا واليابان حينما نظما البطولة سويا .. ويبدو كما قال المعارف أنكم من ذوى البلوجات القيمه والعينه بينه ..تمنياتى لكما بكل خير وستجدانى ان شاء الله من القارئين
أنسان مقيد
الله يبارك فيك
ههههههههههههههههه
أنت وولو واحد طبعا هو يرد أول واحد انت ترد أول واحد في بيتها طبعا
وبعدين مش مشكله البوست دا البوستات جاية كتيييييييييير وتئدر تكومنت اول واحد زي ما أنت عاوز
:D
أظن كدا ردين أهو هبة رد وأنا رد
أصلا من غير ماتقول كنا هانعمل كدا
هو أنت مش عارف احنا بنئدرك أزاي
سلام
maxbeta3zaman
يعني أنت كنت معدي بالصدفة؟
طيب والله دا من حسن حظنا
وياريت تتابع البلوج علي طول
وأحنا عادي يعني بلوجرز قديم اي نعم بس اهو بنحاول نبئي بلوجر كويس
نورتنا:)
الله الله
وانا اخر من يعلم؟؟!!!
ماشى يابلوجاريه
ولو مش من قلب حبيبتى مكنتش اعرف كمان؟
ماشى
يلا امرى لله
عموما بالتوفيق
ربنا معاكوا
ان شاء الله يبقى كويس
عملوها الوحوش
ياريتنى كنت معاهم
:)))
max beta3zaman,
شكرا جدا لتعليق حضرتك و تشجيعك لينا
:)
شريكتي في المدونة فعلا ليها أسلوب راقي و مميز أوي في كتاباتها و حضرتك ممكن تشوف كدة بنفسك في مدونتها التانية، و المدونةدي مجرد تجربة عشان نحاول نكتب بطريقة مختلفة عن مدونتنا الموجودة حاليا
ربنا يكرم حضرتك و بجد تعليقك أسعدنا و يشرفنا تكون من قارئي المدونةإن شاء الله
Habiba,
إيه دة؟؟ يعني احنا الوحوش المرة دي؟
:)
عموما شكرا شكرا على تشريفك لينا
ليكي السبق برده انت اكتشفتي البلوج في أيامه الأولى خالص
نورتي يا حبيبة. أتمنى تزوري البلوج دة دايما لو كتبنا فيه حاجة
:)
مبروك المدونه الجديده وان شاء الله هتكون مفيده لينا جميعا تحياتى ليكى على البلوج الجديد وتقبلى مرورى
إني أحبكم في الله
الله يبارك فيكي
نورتي البلوج الجديد
:)
قلب ينبض الله هترد عليكي قريب إن شاء الله
ألف مبرووووووووووووووك
البلوج الجديد ...الذى اتوقع له طابه مميز جدا فى موضوعاته ورؤيته الخاصه للعالم من حولنا بلغه راقيه وعميقه
تحياتى للكاتبتين الجميلتين اللى حيشتركوا فى هذه المدونه
وبالتوفيق
وباذن الله اكون من المتابعين لها والمعلقين
وكل سنه وانتم دائما طيببين
تحياتى
habiba
خلاص بئي ياحبيبة المسااامح كريييييم
وأنتي أم الكرم كله:D
ربنا يخليكي ياقمر
ومستنيين تعليقاتك الجميله
أني أحبكم في الله
الله يبارك فيكي وأن شاء الله هاتكون زي ما أنتي بتقولي وأحسن كمان
بس تتابعينا بئي ياقمر
نبضات
الله يبااااااااارك فيكيي
وكل سنه وانتي طيبه ومستنيين تعليقاتك عندنا
سلاااااااام
ألف مبرووك على البلوج انشاءالله يكون جامد .. وأنا متأكده :..أنه هيكون حاجه كويسه .. (سؤال غبى معلش .. هو هبه دى واحده صاحبتك تانيه وده تشابه أسماء ... ولا قصدك هبه أنتى ؟؟؟؟؟؟؟؟؟)
Banouta,
إزيك يا بنوتة البناتيت؟
:)
وحشتيني بجد
كل سنة و انت طيبة
اممم... هو غالبا انت كنت شوية مستعجلة فمش أخدتي بالك
البوست اللي مكتوب مش أنا اللي كاتباه
أنا و بلوجر تانية هنكتب في البلوج دة مع بعض.. و بالتالي هبة دي هي أكيد أنا :) لأن مش أنا اللي كتبت الكلام دة
نورتي يا منمن
لا والله انا قريته كويس وكذا مره .. وكنت عارفه أن بالاشتراك معالمدونيين .. بس انا أستغربت لما لاقيتك كاتبه هبه .. بدل يعنى ما تقولى أنا .. دى حاجه كويسه .. أنشاء الله يكون البلوج تمام بتعاونكوا مع بعض لأن أغلب العمال الجماعيه بتدى ثمره كويسه .. وده نتاج تجربه انا عيشتها بالفعل والتجربه دى كانت المسرحيه اللى أنا كنت قولتلكم عليها قبل كده فى بوست
يلا وكل سنه وأنى طيبه
وعلى فكره ده الجروب بتاع المسرحيه لو تحبى تشوفى لقطات منها
http://www.facebook.com/profile.php?id=661871561&v=feed&story_fbid=29925427882#/group.php?gid=20365322125
Post a Comment