!!مجـرد تساؤل

مع الهلــع الشديد من أنفلونزا الخنــازير لقيتني نفسي أسأل اللي حواليا... انتو خايفين "أوي" كدة للدرجة دي فعلا؟
طب ممكن تلبس الكمامة لو لقيت نفسك رايح مكان زحمة أوي أو مغلــق؟؟
ضحكت لمـــا فكرت في تاني سؤال لأني بصراحة مش عارفة فين في مصـر ممكن يكون مش زحمة!!! بس فعلا ... ممكن تفكـر تلبس الكمـامة و لا هتقـــــول منظري وحش أوي أو الكمـامة مش لايقة عليّ عشان وشي صغير أو هتقول محدش لابسها. اشمعنى أنـا ؟؟

تســاؤلات خطرت على بالي من فترة كبيرة "وخصوصا شهـر يوليو" لمـا كان لي تعامل مع مترو الأنفــاق .. و هوالمكـان الوحيـد اللي حسسني إن لازم كمامة إن شالله ألبسها مخصوص جواه هو بس . بس مش كتبت التساؤل غير دلوقتي لأن فوبيـا المرض بدأت حدتها تزيد تاني جداجدا .. خصوصا عشان المدارس
:(
ربنـــا يستر

طب لو في باص أو ميكروباس و لقيت حد بيعطس كتيــر أوي جنبك. ممكن الموقف يوصل بيك لأنك تنزل من المواصلة دي و تدوّر على واحدة غيرها ؟ و لا مش للدرجـة دي؟؟

ولـــو كان شرط الحكومة إنك تاخد اللقاح الواقي من الانفلونزا "اللي لسة نتيجته وآثاره الجانبية مش مؤكدة 100%"
لو عايز تروح الــحج السنـة دي. هتاخده و لا إيه العمـل ؟

Picture taken from raivaescondida.wordpress.com/category/saude/

!!البوبــي اللي اسمه أوسكار

جمعية عالمية للرفق بالحيوان كــنوع من الاحتجاج على قتل الخنازير في مصر...بعتت واحد من مبعوثيها الرسميين

الكلب أوسكار

عشان يقابل وزير الزراعة و يعبر عن رفضه



مع حبي للحيوانات، و إيماني في أوقات كتيرة بأنه لازم يبقى فيه جمعيات فعلا مختصة لحقوق الحيوانات..... بس الحقيقة إن التقرير اللي شفته في برنامج تسعين دقيقة خلاني حسيت إن "الكلب" بجد جاي لوحده!!! اللي جاية معاه هي بنت ماسكة السلسلة بتاعته و قاعدة تاخد

pauses& different shots

عشان التصوير!! و لا حسيتها أبدا مبعوثة من الجمعية بصراحة



........................



الطريقة يمكن حلوة إنه يكون فيه حيوان معروف من الجمعية دي بيسافر كل مكان عشان يعبر عن اعتراض الجمعية نفسها

بس لو كان الوزير قابله...... مش عارفة بصراحة كنت عملت في نفسي إيه



فرحـــت جداااا لما الوزير مش وافق يقابله. أصـــل صعبة أوي أوي أقبلها إن حضراتهم مش يقابلوا الناس اللي بتطالب بحقوقها و بتعمل اعتصامات و تتبهدل عشان تعلن رأيها، و ممكن تفضل أيام في الشارع بس عشان حد يحن عليهم و يقابلهم



و نهايتها يقابلوا. . . . . . . . .كلــــــب

مع احترامي طبعا لحضرته... الكلب يعني

ربنا يخليك ليا

عيوني من كتر السؤال عليك تبان حاضنة الآهات
ولا عارفة بكرة من النهاردا امتي فات

ربنا يخليك ليا وتحبني وتخاف عليا
علمتني أزاي أحب والشوق يبان كله في عنيا

بصلي العين تجاوبك
ضمني خليني جمب
ك قولت أيه تفضل معايا
دي حتي عيني بتقول بحبك


ربنا يخليك ليا وتحبني وتخاف عليا
علمتني أزاي أحب والشوق يبان كله في عنيا

أيه معني السعادة عندك؟

السعادة دا الكنز اللي كلنا بندور عليه

وبنجتهد علي أد مانقدر أننا نلائي معني وتعريف ليها

أو بمعني تاني بنحاول نحصر الحاجات اللي ممكن تخلينا مبسوطين وعايشين حياتنا بشكل طبيعي ومريح

شوفت مشهد في فيلم أجنبي كان فيلم خيال علمي وكان في عالم أستنسخ بنئ آدم وبعدين خلاه يعيش وسط الناس

المهم ماكانش مبسوط في حياته لأن كان كل الناس عارفة أنه مش أنسان بجد مستنسخ يعني

فقرر أنه ينتحر لأن حياته أصبحت جحيم

فجاله العالم اللي أستنسخه بيسأله أنت ليه عاوز تنتحر قاله علشان مش حاسس بالسعاده في حياتي

قاله وأيه معني السعاده عندك؟

ساعتها سكت شويه كدا

كنت أنا وقتها بفكر في أجابة السؤال وأكتشفت أنه صعب جدا لآ شديد الصعوبة

طيب السؤال تاني وياريت تجاوبوني عليه

أيه معني السعادة عندك؟

نرجع للفيلم

الأنسان المستنسخ قاله معني السعادة عندي أني أكون حقيقي

هاتعرف تخليني أنسان حقيقي قاله :لآ

قاله :خلاص يبئي تسيبني أنتحر

وأنتحر فعلا

طبعا أنا ماعرفتش أجاوب علي السؤال

بس قولت أنا بعد كدا ها أرصد كل لحظة سعادة هايمر بيها قلبي وها أسجلها علشان أبئي عارفة أيه الحاجات اللي بتخليني سعيدة ومبسوطة

يعني مثلا أنا لما ببئي مكتئبة باكل شيكولاته علشان انا عارفة أن الشيكولاته بتديني أحساس بالسعادة غير عادي

وبرده لما أبئي مدايئة من حاجة أطلع أقف في نور الشمس علشان نور الشمس بيديني أحساس بالأمل مالوش مثيل

أنا كنت بس حابة أدردش معاكوا شويه علشان أنا مادردشتش من زمان جدا معاكوا وأنتوا بجد وحشتوني

فقولت أدردش في السعادة أصل أنا بمر بمود أكتئاب

عادي يعني داخلة علي أمتحانات

بيمنحني قوة وثقة بالنفس غير عادية

وعلشان أطلع من المود دا بدون وبكتب

حذاء2008 الذي أذهل العالم..وفرحة العرب التي أذهلتني

لن أنكر أنني ابتسمت، بل و صفقت تصفيقــا حادا عندما رأيت المشهد

مشهد رئيس أهم دولة في العالم ينـــــحني... تفاديا لحذاء طائر ظهر فجأة في الأفق متجها إلى رأسه العظيم

بالطبع لن أنكر سعادتي تلك اللحظة

لكنـــها سعادة لحظية... لم تلبث أن تحولت إلى قلق على مصير صاحب الحذاء!!! فبالطبع لا يعرف أحدنا ما سيواجهه في الحقيقة...حتى و إن نشروا في وسائل الإعلام الحكم الذي فرض عليه

لم تمض دقائق على إذاعة خبر تصويب صحفي عراقي حذاءه في وجه بوش خلال اجتماع له بالعراق، حتى حولت معظم الشعوب العربية تلك المناسبة إلى عرس كبير

و بدؤوا في ترديد النكات و السخرية من مشهد الرئيس بوش و مكانته أمام العالم

بالطبع سعدت أنا أيضا... لكني وجدت فرحة العرب مبالغ فيها كثيــــــــرا

لا أدري لم تذكرت حينذاك مناسبة أخرى كانت سعيدة للغاية...و خاصة للمصريين

و هي فوز المنتخب المصري بكأس الأمم الأفريقية

بالطبع يومها سعدنا كثيـــــــرا، و كان ذلك من حقنا

إلا أن يومها أيضا... العديد من المفكرين وجدوا أن الفرحة مبـــالغ فيها

فبالطبع كانت الفرحة تغمر كل شوارع مصر و الوطن العربي، لكنها زادت عن حدها و أخذت أكبر من حجمها -على حد قول الكثيرين-. في ذلك الوقت كنت مكلفة بتغطية الحدث و كتابة تقرير عن رأي بعض المفكرين فيه..... و هذا ربما هو ما ذكرني بحدث الحذاء

أتذكر أن أحدهم قال لي أن الدول العربية تعاني من الكآبة و الحزن بسبب الظروف الكثيرة التي تمر بها، و أنهم في انتظار أي خبر سعيد كي يكون مخرجا لهم مما يعانون

و في ذلك الفوز وجدوا الحجة القوية للاستمتاع بالفرحة لبعض الوقت

و لذلك كانت الفرحة مفرطة ربما

تلك هي أحد الأسباب التي أراها وراء سر السعادة الشديدة بين الشعوب العربية بسبب حذاء منتظر الزيدي

......أمــــا السبب الآخر

ربـــما كان ما فعله الزيدي هو حلم كل عربي

هو ما يود فعله كثيرون إن سنحت لهم الفرصة فقط

أو ربما كان أمنية مدفونة يتمنونها... و لكن إن كانوا مكانه فلن يمتلكوا الشجاعة ليقوموا بفعلته تلك

ربمـــــا كان خنوع العرب و خضوعهم هو السبب وراء تلك السعادة المفرطة

فليس الكثيرون يمتلكون الشجاعة للتعبير عن رأيهم مثل الزيدي

ربمـــا يصبح الحذاء شعارا بعد ذلك في مظاهرات الشعوب العربية و اعتصاماتها لرفض السياسات الأمريكية كما قال أحد كاتبي جريدة الدستور من الشباب

و ربما إن كان الحذاء بمقاس أكبر قليلا... لكانت فرحة العرب أكبر كثيرا

:)

.................

و دة مجرد رأي متواضع

!!! ربما كان شبحا

!!! لم نره يوما

لا.. بل رأيناه مرة واحدة منذ سنين.. فقد كان في ذاك الفرح. لم يكن الأمر بيده في الحقيقة. كان عليه أن يكون هناك

كان يقف بجانب تلك الزهرة البيضاء الجميلة التي جذبت إليها كل الأنظار

ربما تعجبنا وجوده آنذاك!! فلم نسمع عن أمره من قبل.. لكن الفرح لم يكن ليتم لولاه وجوده. فتلك الزهرة رائعة الجمال معه هي صاحبة الفستان الأبيض و الطرحة المنمقة فوق رأسها... و هو الزوج الذي انتظرته طويلا ليضفي لحياتها طعما جديدا

لكننا لم نره بعدها يوما، بل إننا لم نراها هي أيضا حتى وقت قريب!!! احتفظ بتلك الزهرة البريئة له وحده، لا يراها أحد غيره... حتى ذبلت و فقدت بريقها الخاص الذي اعتدناه

و يوما بعد يوم.. زال رحيق تلك الزهرة البيضاء

لم يكن يسمح لها بزيارة أهلها.. و عندما سمح بذلك، لم يكن يذهب معها في زياراتها أبدا

حتى بأيام العيد... لم يره أحد بعد يوم عرسه

!!! لعله كان شبحا

ربما لم يفهم معنى الزواج بالفعل... فهي ليست شركة و ارتباط بين رجل و امرأة فقط... بل هو ارتباط بين عائلتين و مجتمعين مختلفين

لم يعرف ما يعنيه ذلك الارتباط و ما يترتب عليه بالفعل

لم يعني الزواج أبدا... أن تنعزل انت و من تحب... في جزيرة بعدية عن كل البشر

آدي المدرسين و لا بلاااش :p

موقف بفتكره كتير أوي!!! مش عارفة ليه

يمكن قلبي أسود؟؟؟

امممم...يمكن برده

طب بفتكره الأيام دي بالذات ليه؟؟

يمكن عايزة أنتقم؟؟؟

:p

دي هفكر فيها بأة شوية

الموقف كان من سنين كتييييييييييير،و تحديدا في تانية ثانوي

كنت في المدرسة....و الحقيقة إن دي مش حاجة حلوة خالص يعني :) خصوصا إن التطور التعليمي بتاعي كان ماشي بالعكس

يعني فترة ابتدائي كلها كنت بعشق حاجة اسمها مدرسة و كنت فعلا "ببني شخصية" بالمعنى اللي نعرفه بجد

فترة إعدادي الموضوع قل لانتقالي لمدرسة تانية

ثانوي بأة...... مش عارفة أكمل كتابة أقول إيه !!! بس هي بلا شك .. كانت الأسوأ و لله الحمد

إيه اللي حصل بأة؟؟؟

و لا حاجة خالص... كان مدرس العربي شكله زي الشكل التقليدي اللي بيجيبوه في الأفلام أو بيمثله الناس لما يكونوا بيتتريؤوا

أو بمعنى أصح اللي قرأ في مدونة"فاتيما" أم يوسف و هي بتوصف مدرسها هيعرف بالضبط اللي كنت أقصده

المهم ... حضرة المدرس القدير في يوم من الأيام طلب مننا واجب كتابة تعبير،و غلطتي إني كنت مطيعة فكتبته بروقان و بضمير فعلا مش أي كلام و مشي "زي ما كان المفروض يتعمل" للأسف

أخد الكراسات و بعدها بيومين جه و قال 3 أسماء

و ياللمفــــــــــاجأة!!! أنا كنت منهم

وقفنا و في انتظار اللي بيقوله لقيناه بكل بساطة بيقول

نقلتوا الكلام اللي في التعبير دة منين؟؟ طبيعي مش انتو اللي كاتبينه

صعقت طبعا لكلامه و فضلت ساكتةمش عارفة المفروض أرد إزاي

و هنا بدأت واحدة مننا في الانهيار و هي بتحلف بتحلف كتير إن هي مش نقلت حاجة من أي كتاب تاني

ابتسم ابتسامة سخرية،ولحد النهاردة مش عارفة دة كان فعلا عشان كلامها اللي هو مش صدقه و لا لإحساسه إنه بيذل حد أدامه

و رد بأنه متأكد من اللي بيقوله لأن دة مش أسلوب طالبة في ثانوي

و استمرت المفاوضات لدقايق لحد ما قرر يتنازل و يصدق إننا مش نقلنا الكلام دة من أي كتاب

لكن برده مش إحنا اللي كاتبينه!!! مين كتبهولكوا يا حلويييين؟؟؟

ماانتو تهتموا بشكلكوا بشعركوا بخروجاتكوا... لكن تكتبولي حاجة كدة؟؟؟ لااااا

و هنا واحدة اعترفت بأن باباها ساعدها، بس في الأفكار مش أكتر، و هي اللي كتبت كل حاجة بنفسها

ابتسم نفس ابتسامة السخرية مرة تانية و نقل نظره على حضرتي و حضرة البنوتة اللي جنبي و استنى نقر "بالحقيقة" ..أو الجريمة.. اللي في الآخر إحنا مش عملناها أصلا

و هنا حسيت إن دموعي بتفكر .... ناوية تخونني و تنزل!!! أدام الفصل كله مش مشكلة كبيرة بالنسبة لي، لكن....... أدام دة؟؟؟؟؟

Noooooooo

و هنا قررت آخد موقف و كفاية أوي وقفة الدقايق دي. و قلتله أنا مش نقلت أي حاجة، ومش فاهمة ليه موقفنا دلوقتي أساسا

فرد بكل بساطة إنه مستحيل أكون أنا اللي كاتباه

يا بنتي دة أسلوبه جميل جدا !! عايزة تفهميني إنك "انت".. تعرفي تكتبي كدة؟؟؟

هاهااااي

و هنـــــا....... كـــــــانت النهاية

:)

قلتله أيوة أنا، و صاحبتي كمان شاطرة جدا و انت اللي متعرفناش

و لعلمك أنا عمري ما وقفت الوقفة دي، و مش هقفها دلوقتي لأن أنا مش عملت حاجة غلط أساسا

...................

و قــــعدت :$

بصراحة كنت مستنية لكمة أو صفعة أو أي حاجة من الكلام الكبير دة في أي لحظة!!! بس الحمدلله مش حصل

مستنية كدة أيوة بجد. لأن المعلم المفروض يكون "مربّـي" قبل ما يكون معلم

و لما يحبط شغلي و يكدبني و يكون مؤمن جدا جداجدا بأن اللي أدامه دة مستحيل يكون عنده أي قدرات و يدفن كدة كل المهارات بإيديه.... يبقى أكيد هو مش عارف أي معنى للتربية، و مش يستحق أعتبره مدرس بحق

الحمدلله إنها جت على شوية زعيق و خلصت :)، و أنا بكل غتاتة الدنيا قاعدة مكاني بنظرة تحدي و مش كنت ناوية أقوم

..............................................................

بس كمان أحيانا لما بفتكر عمو دة، بفتكرموقف تاني معاه

موقف و أنا في ابتدائي أيام البراءة

الموقف برده كان مع العربي... بس المرة دي كانت مدرسة مش مدرس

لما كنت طفلة في تانية ابتدائي كانت مدرستي "ماجدة" كويتية

:$ و دة بطبيعة الحال لأني كنت في الكويت

بس أنا كنت لسة صغيرة أوي، و مش كنت قادرة أستوعب أيييييي كلمة من اللي هي بتقوله أساسا :))). كانت تتكلم تتكلم طوووووول الحصة،و أنا أطلع منها زي ما دخلت

هو فيه إيه؟؟؟

لغاية ما في يوم مش قدرت أستحمل و رحت لماما حكيتلها إن الست الغريبة دي مش بتتكلم عربي!! و أنا مش فاهمة حاجة أنا عايزة أروح مدرسة تانية

إهئ إهئ إهئ :((

المهم إن ماما راحت اليوم اللي بعده و فهمتها إني مش بفهم و لا كلمة منها

المدرسة كان ممكن تطنش

أو كان ممكن تحاول تفهمني في السريع بعدما تشرح و خلاص. دة فيه كتير طلاب غيري يعني

بس هي مش عملت كدة خالص

هي طلعتني أكون في حصة العربي في أول صف أدامها علطول، و بقت تحاول تتكلم بطييييئ، و كتير كانت بتتكلم مصري مكسر عشان خاطر المصريين اللي في فصلها، و بعد دة كله.. كانت بعد كل فقرة من الكلام تقرب مني و تسألني و تتأكد مني إذا كنت فهمتها و لا لأ رغم إن دي طريقة كلامها!! و هي مش بتشرح فيزياء و لا رياضيات و لا حاجة عويصة!! كلجريمتها إنها بتتكلم بلغتها الأصلية مش أكتر

طيب... استمرت كدة أسبوع أو بالكتير أسبوعين عشان خاطر مامتي يمكن؟؟؟ لأ خالص

استمريت أقعد في أول صف في حصتها يمكن لنهاية التيرم، و استمرت في حوارنا الخاص اللي تتأكد منه إني كويسة لآخر السنة

:)

دي بجد اللي أقول عليها مدرسة بكل معنى الكلمة و أنا مبسوطة

عمـــري في حياتي ما هنسى احتضانها لكل التلاميذ و إحساسنا بجد بأنها أمنا و إننا مش قلقانين من وجودنا بعيد عن أهلنا

كمان عمري ما هنسى شكل و لا طعم البونبون اللي كانت بتديه للشاطرين كل يوم :)و عمرها ما نسيته غير مرة واحدة أعتقد

صـــعب أوي لما نعمل مقارنة بين شخصيتين متناقضتين، بس ساعات لازم نعمل المقارنات دي عشان نحس بالفرق و نعرف اللي المفروض يحصل