السعادة دا الكنز اللي كلنا بندور عليه
وبنجتهد علي أد مانقدر أننا نلائي معني وتعريف ليها
أو بمعني تاني بنحاول نحصر الحاجات اللي ممكن تخلينا مبسوطين وعايشين حياتنا بشكل طبيعي ومريح
شوفت مشهد في فيلم أجنبي كان فيلم خيال علمي وكان في عالم أستنسخ بنئ آدم وبعدين خلاه يعيش وسط الناس
المهم ماكانش مبسوط في حياته لأن كان كل الناس عارفة أنه مش أنسان بجد مستنسخ يعني
فقرر أنه ينتحر لأن حياته أصبحت جحيم
فجاله العالم اللي أستنسخه بيسأله أنت ليه عاوز تنتحر قاله علشان مش حاسس بالسعاده في حياتي
قاله وأيه معني السعاده عندك؟
ساعتها سكت شويه كدا
كنت أنا وقتها بفكر في أجابة السؤال وأكتشفت أنه صعب جدا لآ شديد الصعوبة
طيب السؤال تاني وياريت تجاوبوني عليه
أيه معني السعادة عندك؟
نرجع للفيلم
الأنسان المستنسخ قاله معني السعادة عندي أني أكون حقيقي
هاتعرف تخليني أنسان حقيقي قاله :لآ
قاله :خلاص يبئي تسيبني أنتحر
وأنتحر فعلا
طبعا أنا ماعرفتش أجاوب علي السؤال
بس قولت أنا بعد كدا ها أرصد كل لحظة سعادة هايمر بيها قلبي وها أسجلها علشان أبئي عارفة أيه الحاجات اللي بتخليني سعيدة ومبسوطة
يعني مثلا أنا لما ببئي مكتئبة باكل شيكولاته علشان انا عارفة أن الشيكولاته بتديني أحساس بالسعادة غير عادي
وبرده لما أبئي مدايئة من حاجة أطلع أقف في نور الشمس علشان نور الشمس بيديني أحساس بالأمل مالوش مثيل
أنا كنت بس حابة أدردش معاكوا شويه علشان أنا مادردشتش من زمان جدا معاكوا وأنتوا بجد وحشتوني
فقولت أدردش في السعادة أصل أنا بمر بمود أكتئاب
عادي يعني داخلة علي أمتحانات
بيمنحني قوة وثقة بالنفس غير عادية
وعلشان أطلع من المود دا بدون وبكتب
5 comments:
عزيزتي ذات القلب النابض
هي الامتحانات بتسبب الأكتئاب للناس الشاطره كمان؟
:)
مش عارف كنت دايما أقول معنى السعاده أن الواحد يكون راضي
لأن طول ما الواحد راضي مش هيحس انه مش سعيد
يعني حاجه كده من باب زوال الألم بزوال المسبب
على الهامش
يارب يكون التدوين ضيع شويه من الاكتئاب
إن شاء الله الامتحان هييجي جميل يا رودا :). مش تقلقي
امممم.... السعادة؟؟
مبدئيا بحس إن السعادة فعلا أهم و أقرب معنى ليها هوالرضا.. زي ماإنسان مقيد قال
الشوكولا فعلا بتدي إحساس رهيـــب بالسعادة:) لأ و كمان معايا.. أنا من الناس اللي بتتأثر بحاجات كتير كدةفي الأكل:)يعني لو شربت نسكافيه بالليل أوي ممكن مش أعرف أنام،وشوكولا لو حاجة نضيفةونسبة كبيرة بهايبر جااامد:) فلأ بتسعد بتسعد يعني
بتعمل دماغ من الآخر :p
بس سعادة الشوكولا سعادة وقتية مش أكتر..زيها زي سماع فيروز بالنسبة لي اللي تخليني عايشةف عالم تاني ولا حاسة بأيي حاجة بتحصل حواليا، زي الوقفة أدام البحر، زي حاجات كتير كدة
بس السعادة الحقيقية فعلا بلاقيها بجد في معنى العطاء بكل أنواعه
إنك تحسي إنك أضفتي للمكان دة حاجة فبقى شكله حلو، أو علمتى الولددة حاجة عمره في حياته ما هينساها "يابختك ياللي بتعلمي;)"،أو فعلا حسيتي إنك قدرتي تخلي اللي قدامك يبتسم من قلبه
مش بتهيألي فيه حاجة ممكن تفرح في كل الدنيا أكتر من كدة
بجد...مساعدة الناس طعمها فظيـــع،وبتحسيها من جواكي و من الدنيا حواليكي لما يبتسموا ليكي
كمان لما تشوفي طفل بيضحك:)دي جميلةأوي أوي برده
هو البوست دة مخصوص عشاني؟ :)). لو أيوة يبقى ربنا يخليكي لي بجد،ولو لأ برده يخليكي لي يعني
شكرا بجد يا قلب..على كل حاجة
فرحت جدا لما لقيت بوست جديد:).ومش هعتذر عن الإطالة لأنه البوست الوحيد اللي ممكن أقول دة مكــــاني
:)
سبب أخير للسعادة اللي بجد. انك يكون حواليكي ناس بيحبوكي في الله و يقربوكي من ربناومش يسيبوكي أبدا تقعي لوحدك
و إن يكون عندي ناس زيك انت يا قمري:)و إنسان مقيد..ناس مش هلاقي زيهم في الدنيا كلها
اخيرا نزلتى حاجه هنا؟
يعنى بعد كده اتمنى ان يبقى عندك امتحانات دايما علشان تكتبى؟ :)
السؤال صعب فعلا
بس تعرفى فكره انك تسجلى الحاجات اللى بتسعدك علشان تعرفى انتى بتبقى سعيده ازاى دى حلوه اوى هغشها منك :)
انا مع مقيد اوى فى حكايه ان السعاده هى الرضا بس المشكله اساسا اننا نقدر نوصل لمرحله الرضا
حاجه يمكن بتسعدنى اكتر من اى حاجه فى الدنيا هى انى احس ان اللى حوايلا بيحبونى بجد من غير اى مصلحه
وكمان انى اقدر اعمل لاى حد بحبه او محتاج حاجه تخليه سعيد
بجد بحس بسعاده مش عاديه
جاير يكون فى حاجات تانيه بس دماغى مش جايبها دلوقت
لو افتكرت حاجه تانيه هبقى ارجعلك تانى :)
ربنا يعدى امتحاناتك على خير يارب
باى ياقمر
نسيت معنى سعادة مهم أوي
:)
إني ألاقي الحب الحقيقي و نفضل مع بعض طول العمر
تفتكري هلاقيه؟؟؟
السلام عليكم
شئ جميل اوى انك تفضفضى
ربنا يبعد عنك الأكتئاب ويوفقك
أنا كمان بحب آكل شيكولاته لما أكون مكتئبه بس أنا برضه زى بوبه كده مجرد سعاده وقتيه
ربنا يسعك دايما
Post a Comment